Allir póstar eftir

Guðmundur Rúnar Árnason

Samningur við Kerfóðrun samþykktur

By Fréttir

Kjarasamningur sem gerður var við Kerfóðrun sl. föstudag, var samþykktur í atkvæðagreiðslu í dag. Þrjú verkalýðsfélög eiga aðild að samningnum: Verkalýðfélagið Hlíf, VM og FIT.

Á kjörskrá voru 26 og 23 greiddu atkvæði – eða 88,5%. Af þeim sögðu 22 já, eða 95,6%. Einn greiddi atkvæði gegn samningnum. Hann er því samþykktur.

Alþjóðlegur baráttudagur gegn kynbundnu ofbeldi

By Fréttir

Í dag er alþjóðlegur baráttudagur Sameinuðu þjóðanna gegn kynbundnu ofbeldi og það á tímum kórónuveirufaraldursins, með tilheyrandi nýjum og ýktari birtingarmyndum ofbeldis gegn konum. Á heimsvísu má greina óhugnanlega aukningu á ofbeldi í nánum samböndum og stafrænni kynferðislegri áreitni sem tengist því hversu  margar konur eru bundnar heima við vegna samkomutakmarkanna og útgöngubanna. UN Women hafa nefnt þetta skuggafaraldur kórónuveirunnar.

Verkalýðshreyfingin hefur bent á að konur eru meirihluti þeirra sem starfa í svokölluðum framlínustörfum á tímum veirunnar, þ.e. starfsfólk í heilbrigðis- og félagsþjónustu, fræðslu, þjónustu og verslun, þar sem þær verða fyrir síauknu áreiti og hótunum af hálfu samborgara sinna, sem bætist ofan á hræðslu við smit og almennt andlegt og líkamlegt álag. Þá hefur atvinnuleysi einnig bitnað harkalega á konum.

Alþýðusamband Íslands hefur lýst yfir áhyggjum af neikvæðum áhrifum kórónuveirunnar á kynjajafnrétti enda hefur Ísland ekki farið varhluta af skuggafaraldrinum. Eins og fram hefur komið í fjölmiðlum hafa tilkynningar um heimilisofbeldi til lögreglu aldrei verið fleiri en nú í ár samanborið við fyrri ár.

Alþjóðasamband verkalýðsfélaga (ITUC) kallar eftir því að ríki fullgildi samþykkt nr. 190 sem þing Alþjóðavinnumálastofnunarinnar (ILO) samþykkti. Henni er ætlað að vernda fólk gegn ofbeldi og áreitni í öllum myndum í heimi vinnunnar. Í samþykktinni er notast við víða skilgreiningu á „heimi vinnunnar“ með tilliti til þess að í dag fer vinna ekki alltaf fram á eiginlegum vinnustað. Skilgreiningin nær meðal annars yfir ofbeldi og áreitni í vinnutengdum ferðalögum, á leið í og úr vinnu, í húsnæði sem atvinnurekandi útvegar eða í vinnutengdum samskiptum, meðal annars þeim sem fara fram með hjálp upplýsinga- og samskiptatækni.

ASÍ tók þátt í gerð samþykktar nr. 190 um ofbeldi í heimi vinnunnar og skorar á stjórnvöld að vinna markvisst að því að hún verði staðfest af Íslands hálfu sem allra fyrst.

Ólga í leikskólum bæjarins

By Fréttir

Mikil ólga er í leikskólum bæjarins, meðal annars vegna áforma um að hafa skólana opna í allt sumar. Trúnaðarmenn á leikskólum og stjórn félagsins funduðu í gær og þar var samþykkt eftirafarandi ályktun:

Fjölmennur fundur trúnaðarmanna félaga í Verkalýðsfélaginu Hlíf sem starfa á leikskólum í Hafnarfirði, ásamt stjórn félagsins, mótmælir harðlega illa undirbúnum áformum um að hafa leikskóla bæjarins opna í allt sumar. Það er ljóst að þetta mun bitna á faglegu starfi skólanna, raska bæði starfi útskriftarhópa og aðlögun að hausti og breyta leikskólum úr fræðslustofnunum í geymslustaði fyrir börn. Fundurinn hvetur bæjarstjórn til þess að endurskoða ákvörðunina.

Jafnframt harmar fundurinn áhugaleysi bæjaryfirvalda varðandi ákvæði kjarasamninga um styttingu vinnutímans og bætta vinnustaðamenningu. Fyrsti janúar er skammt undan og sums staðar er undirbúningur mjög skammt á veg kominn. Fundurinn minnir á, að útfærslan á að vera niðurstaða samkomulags á hverjum vinnustað sem bera skal undir atkvæði, en ekki einhliða ákvörðun stjórnenda og yfirmanna.

Að lokum bendir fundurinn á, að leikskólarnir eru verulega undirmannaðir og með auknum kröfum, sem m.a. fylgja kjarasamningum háskólamenntaðs starfsfólks leikskólanna, er stöðugt verið að auka álag á ófaglært starfsfólk leikskólanna. Það gengur ekki endalaust. Fundurinn hvetur bæjaryfirvöld til að taka sér tak og meta þennan hóp starfsfólks að verðleikum, til jafns við aðra. Án þessa hóps væri ekki hægt að halda úti leikskólastarfi í bænum.