Gildi lækkar vexti á verðtryggðum lánum.
Gildi-lífeyrissjóður býður sjóðfélögum sínum nú lægstu föstu verðtryggðu vextina á húsnæðislánum frá upphafi eða 3,55%. Breytilegir vextir á verðtryggðum lánum sjóðsins eru nú frá 3,20% og á óverðtryggðum lánum frá 6,75%. Vextirnir eru með þeim lægstu sem í boði eru á húsnæðislánamarkaðnum í dag.
Sjóðfélagar Gildis njóta töluverðs sveigjanleika þegar kemur að húsnæðislánum sjóðsins. Hægt er að velja á milli verðtryggðra og óverðtryggðra lána, fastra og breytilegra vaxta. Lánstími er allt að 40 árum og veðhlutfall allt að 75%. Lántökugjaldið er 0,5% af lánsupphæð. Gildi hefur boðið sjóðfélögum sínum upp á húsnæðislán af þessu tagi frá árinu 2013.
Allir sem greitt hafa í Gildi og séreignarsjóði Gildis eiga rétt á láni frá sjóðnum.
Markmið Gildis með lánunum er að vera bakhjarl sjóðfélaga sinna í þessari mikilvægu fjárfestingu sem kaup á húsnæði er. Einnig eru sjóðfélagalán traustur fjárfestingarkostur og veitir áhættudreifingu í safni sjóðsins.
Gildi-lífeyrissjóður varð til við sameiningu Lífeyrissjóðsins Framsýnar og Lífeyrissjóðs sjómanna 1. júní 2005. Markmið sjóðsins er að tryggja sjóðfélögum bestu lífeyrisréttindi sem kostur er á með öflugri áhættustýringu og ávöxtun iðgjalda.